[110] EPISTOLA X.

Reverendo Domino

IOANNI HOGELANDO,

Decano Ecclesiae & nostrae Beatae MARIAE Trajectensis cum primis in CHRISTO nobis dilecto.

Heroicam animi tui virtutem, atque cordati pectoris dexteritatem, Reverende Domine DECANE, memorando commonstrasti exemplo: qui non contentus cum tuo Capitulo, praeter votum, omnemque spem, privatim nobis gratificari, caeteras etiam Ecclesias, ea qua posses auctoritate & suadela, in beneficentiae ac liberalitatis erga nos vestrae consortium perduxeris. Ea propter nos tibi tuoque Capitulo tantum debere profitemur, quantum vix ab ullo grato homine refundi queat, certe quidvis nobis potius defuisse cernetis, quam paratissimam de vobis bene merendi voluntatem. Qua de re fusius in literis nostris ad quinque Ecclesias. Valeat Dominatio Vestra aevo semper optato atque felici, suisque confratribus plurimam dicat salutem, nostro nomine, nec non plurimam gratiarum actionem, nullo unquam tempore abolendam. Batavoduri. IV. Aprilis. Anno MDLXVI.

FREDERICUS,

Archiepiscopus Trajectensis.

Ex animo Vester.